Қазақстанның Сыртқы сауда палатасы Қазақстан-Кения бизнес-форумына қатысты

Қазақстан мен Кения сауда-экономикалық ынтымақтастықтың жаңа бағыттарын Қазақстан Республикасының Президенті Қасым-Жомарт Тоқаев пен Кения Республикасының Президенті Уильям Рутоның қатысуымен 20 мамыр күні Астанада өткен Қазақстан-Кения бизнес-форумы аясында талқылады. Іс-шара екі елдің мемлекеттік органдарының, іскер топтарының, даму институттарының және бейінді ұйымдарының өкілдерін біріктірді.

Форум екіжақты ынтымақтастықты дамыту, сауда, логистика, цифрлық инфрақұрылым және инвестициялық өзара іс-қимыл перспективаларын талқылауға арналған маңызды алаңға айналды. Іс-шара аясында B2B кездесулер, тақырыптық панельдік сессиялар және қол қойылған құжаттармен алмасу рәсімі өтті.

Форумның ресми ашылуы Қазақстан мен Кения өкілдерінің құттықтау сөздерімен басталды. Атап айтқанда, ҚР СІМ Инвестициялар комитетінің төрағасы Ғабидолла Оспанқұлов, Кенияның Инвестициялар агенттігінің бас директоры Джон Мвэнда және Кения Ұлттық сауда-өнеркәсіп палатасының вице-президенті Мұстафа Рамадхан сөз сөйледі.

Іскерлік бағдарлама аясында финтех құралдары мен цифрлық инфрақұрылым арқылы Қазақстан мен Кения арасындағы сауда байланыстарын дамытуға, сондай-ақ көлік-логистика жүйелерін сауда мен инвестициялардың драйвері ретінде қарастыруға арналған панельдік сессиялар өтті. Талқылауларға екі елдің мемлекеттік құрылымдарының, даму институттарының және бизнес өкілдері қатысты.

Форумның маңызды қорытындыларының бірі Қазақстан мен Кенияның бейінді институттары арасында қол қойылған құжаттармен алмасу рәсімі болды. Атап айтқанда, Қазақстанның Сыртқы сауда палатасы мен Кенияның Ұлттық сауда-өнеркәсіп палатасы (KNCCI) арасында құжаттармен алмасу жүзеге асырылды.

Қазақстан-Кения бизнес-форумының өтуі іскерлік диалогты дамыту, кәсіпкерлер арасындағы тікелей байланыстарды кеңейту және Қазақстан мен Кения арасындағы сауда-экономикалық ынтымақтастықты нығайту жолындағы маңызды қадам болды.