Қазақстан мен Жапонияның Сыртқы сауда палаталары практикалық бизнес-әріптестікті нығайтуда

2026 жылғы 9 ақпанда Қазақстанның Сыртқы сауда палатасының Халықаралық ынтымақтастық департаментінің директоры Диана Жакутова мен Қазақстанның Сыртқы сауда палатасының Жапониядағы өкілі Лейла Сарсембаева арасында жұмыс кездесуі өтті. Кездесу барысында тараптар қазақстан-жапон іскерлік ынтымақтастығының ағымдағы жағдайы мен оны одан әрі дамыту перспективаларын, сонымен қатар бірлескен жобаларды сүйемелдеудің практикалық тетіктерін талқылады.

Кездесу барысында қатысушылар Қазақстан нарығына шығуға мүдделі жапондық компаниялардың өтінімдері мен сұранымдарымен жұмыс істеудің нақты алгоритмін қалыптастыру тәсілдерін қарастырды. Бұл ретте Палатаның ақылы және ақысыз қызметтерін айқын ажырату арқылы өзара іс-қимылдың тұрақты әрі түсінікті моделін қалыптастыру мәселесіне баса назар аударылды.

Сондай-ақ қазақстандық бизнестің Жапония нарығына шығу мүмкіндіктері туралы хабардарлығын арттыруға ерекше мән берілді. Осы тұрғыда кәсіпкерлермен жүйелі жұмыс жүргізу, сондай-ақ екі елдің кәсіпкерлері қатысатын конференциялар мен кездесулер ұйымдастыру форматтары талқыланды.

Практикалық өзара іс-қимылды дамыту аясында Қазақстан мен Жапония кәсіпкерлері үшін екі елдің салалық сарапшыларының қатысуымен 2-3 екіжақты семинар өткізу мүмкіндігі қарастырылды. Ынтымақтастықтың перспективалы бағыттарының қатарында Жапонияның заманауи технологияларын Қазақстанда енгізу, соның ішінде жапондық технологиялық шешімдерді пайдалана отырып экологиялық таза өнім жеткізуді жүзеге асыру мүмкіндіктері атап өтілді.

Жапон тарапы Орталық Азия елдерімен өзара әрекеттесуді кеңейтуге мүдделілік танытып, тұрақты бизнес-байланыстарды қалыптастыруға, сондай-ақ білім беру, медицина және мәдениет салаларындағы ынтымақтастықты дамытуға бағытталған гибридті іс-шараларды өткізуге дайын екенін білдірді.