Астанада Қазақстан-Иордания бизнес-форумы Қазақстан Президенті мен Иордания Королі қатысуымен өтті

2025 жылғы 27 тамызда Астанада Қазақстан мен Иордания арасындағы сауда-экономикалық және инвестициялық ынтымақтастықты кеңейтуге арналған маңызды алаңға айналған Қазақстан-Иордания бизнес-форумы өтті.

Форумның айрықша оқиғасы – Қазақстан Республикасы Президенті Қасым-Жомарт Тоқаев пен Иордания Королі II Абдалла бен әл-Хусейннің қатысуы болды. Бұл екіжақты қатынастардың жоғары сенім деңгейі мен стратегиялық сипатын айқындады.

Форум жұмысына Қазақстан мен Иорданияның мемлекеттік органдары мен бизнес-қоғамдастықтарының өкілдері қатысты. Олардың қатарында ҚР СІМ Инвестициялар комитетінің төрағасы Ғабидулла Оспанкулов, Иордания Өнеркәсіп палатасының төрағасы Фатхи әл-Джагбир, Иордания Сауда палатасының төрағасы Халиль Абдель Рахман, сондай-ақ іскерлік қауымдастықтар мен компаниялардың жетекшілері бар.

Қатысушыларға құттықтау сөзін Қазақстанның Сыртқы сауда палатасы Басқарма мүшесі – Аппарат басшысы Асан Жәкішев жолдады.

«Иордания – Қазақстанның Таяу Шығыстағы стратегиялық әріптесі. Тығыз байланыстарға қарамастан, өзара сауда көлемі әлеуетке толық жете қойған жоқ. Біз бірге фармацевтика, туризм, логистика және ауыл шаруашылығы салаларында ынтымақтастықты кеңейте аламыз. Форум орнықты әрі стратегиялық жобаларды дамытуға маңызды қадам болмақ», – деді Асан Жәкішев.

Форум аясында 2025 жылғы 19 тамызда өткен Қазақстан-Иордания Іскерлік кеңесінің төртінші отырысының қорытындыларына ерекше назар аударылды. Іс-шараға жеке және мемлекеттік сектордың 30-дан астам өкілі қатысты. Ұсыныстар қатарында – Астана мен Амманда бірлескен көрмелер өткізу, ұлттық инвестициялық платформалар арасында деректер алмасу, сондай-ақ Қазақстанда Иордания сауда офисін ашу мәселесін қарастыру бар.

Форумда сонымен қатар инфрақұрылым, агротехнологиялар және жаңартылатын энергия көздері саласындағы ынтымақтастық перспективалары талқыланды.