Астанада Қазақстанның Сыртқы сауда палатасы мен «Чжунцзян» халықаралық корпорациясының кездесуі өтті

2025 жылғы 14 тамызда Астанадағы «Атамекен» өңірлік кәсіпкерлер палатасы алаңында Қазақстанның Сыртқы сауда палатасы (ССП) мен «Чжунцзян» халықаралық корпорациясының делегациясы арасында кездесу өтті.

«Чжунцзян» халықаралық корпорациясы — мықты қаржылық негізі бар, халықаралық тәжірибесі мол және жобаларды іске асыруда кешенді тәсіл қолданатын көпсалалы мемлекеттік компания. Құрылыс, сауда және инфрақұрылымға инвестицияны біріктіре отырып, корпорация «Бір белдеу, бір жол» бастамасы мен қалалық құрылыстың жаңа үлгілері аясында табысты жұмыс істеп, ұзақ мерзімді ынтымақтастық үшін сенімді серіктес ретінде беделге ие болды.

Қазақстан тарапынан кездесуге ССП коммерциялық қызмет департаменті директорының орынбасары Әлішер Даркембаев және Астана қаласы Кәсіпкерлер палатасының директоры Жеңіс Тайшытаев қатысты. Қытай тарапынан — China Jiangsu International Group бас директорының орынбасары Ху Лин, коммерциялық мәселелер жөніндегі көмекші Акетилек Берлиесхан, Қазақстандағы өкіл Гүлмира Салиева және «TRZ ENERGY» ЖШС атқарушы директоры Рүстем Бектұрумов қатысты.

Кездесу барысында корпорацияның тарихы, құрылымы, негізгі қызмет бағыттары және Орталық Азия елдерін қоса алғанда, халықаралық жобаларды жүзеге асыру тәжірибесі таныстырылды. Тараптар инфрақұрылымдық құрылыс, көлік-логистикалық тораптарды дамыту, индустриялық парктер, тұрғын үй кешендері мен энергетика нысандарын, соның ішінде жаңартылатын энергия көздерін дамыту салаларында ынтымақтастық перспективаларын талқылады.

Сонымен қатар, «Бір белдеу – бір жол» бастамасы аясындағы ынтымақтастық мүмкіндіктері, бірлескен инвестициялық жобалар, мемлекеттік-жекеменшік әріптестік форматтарын пайдалану және озық технологияларды енгізу мәселелері қаралды. Кадрларды даярлау және оқыту, мамандар алмасу, оқу орталықтарын құру, тағылымдамалар ұйымдастыру және біліктілікті арттыру тақырыптарына да ерекше назар аударылды.

Кездесу соңында тараптар ынтымақтастықтың басым бағыттарын айқындап, жол картасын қалыптастыру тәсілдерін келісіп, ниет туралы келісімдерге қол қою мүмкіндігін қарастырды.

ССП коммерциялық қызмет департаменті директорының орынбасары Әлішер Даркембаев атап өтті: «Инфрақұрылымды жаңғырту, логистикалық хабтарды дамыту, өнеркәсіпке озық технологияларды енгізу, сондай-ақ жаңа экономикалық жобалар үшін кадрлар даярлау сияқты салаларда шетелдік компаниялармен әріптестікті кеңейту үшін үлкен әлеует бар екенін көреміз. Бүгінгі кездесу жемісті диалогтың бастауы болып, біздің экономикаларымызға пайда әкелетін, жаңа жұмыс орындарын ашатын және өңірдің тұрақты дамуына үлес қосатын бірлескен жобаларға жол ашады деп сенемін».

Келіссөздер қорытындысы бойынша тараптар ұзақ мерзімді әріптестікке мүдделілігін растады және ынтымақтастықтың нақты бағыттары бойынша жұмысты жалғастыруға келісті.