Астанада Қазақстан–Оман Іскерлік кеңесін құру мәселесі талқыланды

2026 жылғы 3 шілдеде «Атамекен» Қазақстан Республикасының Ұлттық кәсіпкерлер палатасы алаңында Қазақстанның Сыртқы сауда палатасы Басқарма төрағасы Мұрат Қарымсақовтың Қазақстан Республикасы Сыртқы істер министрінің орынбасары Әлібек Қуантыровпен кездесуі өтті.

Кездесуге сондай-ақ Қазақстанның Сыртқы сауда палатасының Халықаралық ынтымақтастық департаментінің директоры Диана Жакутова, Қазақстан Республикасы Сыртқы істер министрлігі Азияның үшінші департаменті директорының орынбасары Әсемқан Смағұлов, аталған департаменттің кеңесшісі Талғат Ілияс, сондай-ақ Қазақстан тарапынан Қазақстан–Оман Іскерлік кеңесінің тең төрағасы лауазымына кандидат Никита Мальчиков қатысты.

Кездесудің негізгі тақырыбы Қазақстан Республикасы мен Оман Сұлтандығы арасындағы сауда-экономикалық ынтымақтастықты дамыту болды. Қатысушылар екі елдің іскерлік қауымдастықтары арасындағы тікелей өзара іс-қимылды дамытуға арналған тиімді алаң болуға тиіс Қазақстан–Оман Іскерлік кеңесін құру мәселесіне ерекше назар аударды. Кездесу барысында Кеңесті қалыптастырудың ұйымдастырушылық мәселелері, оның ішінде Қазақстан және Оман тараптарынан тең төрағаларды тағайындау мәселелері қаралды.

Қатысушылар Қазақстан–Оман Іскерлік кеңесінің құрылуы іскерлік байланыстарды жандандыруға, инвестициялық ынтымақтастықты дамытуға, кәсіпкерлер арасындағы өзара іс-қимылдың жаңа бағыттарын айқындауға және бірлескен жобаларды іске асыруға ықпал ететінін атап өтті.

Айта кету керек, 2026 жылғы қаңтар–сәуір айларының қорытындысы бойынша Қазақстан мен Оман арасындағы тауар айналымы 238,1 мың АҚШ долларын құрады. Қазақстанның Оманға экспортында электр тогын басқаруға арналған аппаратураның бөлшектері, қозғалыс қауіпсіздігін қамтамасыз етуге және басқаруға арналған электр құрылғылары, сондай-ақ пластмассадан жасалған бұйымдар басым. Ал Оманнан Қазақстанға импорт құрылымында парфюмериялық өнімдер, косметикалық құралдар, сабын және мыс концентраттары негізгі орын алады.