В Астанада түсті металлургия саласындағы Қазақстан–Қытай ынтымақтастығының перспективалары талқыланды

2026 жылғы 22 шілдеде Астанада Қазақстан Республикасы мен Қытай Халық Республикасының мемлекеттік органдарының, салалық қауымдастықтарының, бизнес өкілдерінің және жетекші компанияларының басын қосқан Түсті металлургияның тұрақты дамуы жөніндегі Қазақстан–Қытай форумы өтті. Форум инвестициялар тарту, өнеркәсіптік кооперацияны дамыту, заманауи технологияларды енгізу және тау-кен металлургия кешеніндегі бірлескен жобаларды іске асыру мәселелерін талқылауға арналған алаң болды.

Іс-шараны Қытайдың салалық ұйымдары ұйымдастырды, ал Қазақстан тарапынан бірлескен ұйымдастырушы ретінде Қазақстанның Сыртқы сауда палатасы қатысты.

ҚР ҰКП «Атамекен» атынан форум қатысушыларына Ұлттық палатаның Тау-кен металлургия кешені департаментінің директоры – басқарушы директор Рустам Шунтуков құттықтау сөз сөйледі. Ол өз сөзінде «Атамекеннің» бизнес пен мемлекет арасындағы сындарлы өзара іс-қимылдың негізгі алаңы екенін, кәсіпкерлер қауымдастығының сарапшылық әлеуетін біріктіріп, инвестициялық жобаларды іске асыру үшін қолайлы жағдай қалыптастыруға ықпал ететінін атап өтті.

Рүстам Шүнтіковтың айтуынша, бүгінде Қазақстан жер қойнауын пайдалану мен тау-кен металлургия кешеніндегі инвестициялық жобаларды іске асыру үшін ең тартымды юрисдикциялардың бірі болып табылады. Бұған минералдық-шикізат қорының молдығы, дамыған өнеркәсіптік база, жоғары білікті кадрлар және бизнесті жүргізу жағдайларын жетілдіруге бағытталған дәйекті мемлекеттік саясат ықпал етуде.

Оның айтуынша, Қазақстан бірегей ресурстық базаға ие. Ел аумағында шамамен 10 мың кен орны бар, оның ішінде алтын қоры – 2,3 мың тоннадан астам, көмір – 33,5 млрд тонна, темір кені – 26,7 млрд тонна. Сонымен қатар республикада стратегиялық маңызы бар сирек және жерде сирек кездесетін металдардың елеулі қоры шоғырланған. Олардың қатарында шамамен 2,4 млн тонна вольфрам, 1 млн тонна молибден, 226,9 мың тонна литий, 117,5 мың тонна бериллий және 27,2 мың тонна ниобий бар. Мұндай әлеует ұзақ мерзімді инвестициялық жобаларды іске асыруға және заманауи өндірістерді дамытуға берік негіз қалайды.

«Атамекен» ҰКП өкілінің айтуынша, халықаралық бизнестің жоғары сенімі Қазақстанға Rio Tinto, Fortescue, Arras Minerals, East Star Resources, Pallas Resources және Sarytogan Graphite сияқты әлемдік жетекші компаниялардың келуімен расталып отыр.

Сонымен қатар саланы дамытудың келесі кезеңі минералдық ресурстарды игерумен ғана шектелмей, шикізатты терең өңдеуді дамытуға, жоғары қосылған құны бар өндірістерді құруға және ел ішінде толыққанды өндірістік тізбектер қалыптастыруға бағытталуы тиіс. Осы мақсаттарға қол жеткізу үшін Қазақстан заманауи технологияларды, өндірістік құзыреттерді және халықаралық компаниялардың тәжірибесін тартуға мүдделі. «Атамекен» ҰКП серіктестер іздеу, өнеркәсіптік кооперацияны дамыту және инвестициялық жобаларды сүйемелдеу бойынша сенімді алаң болуға дайын.

«Бүгінде Қазақстан тау-кен металлургия кешеніндегі инвестициялық жобаларды іске асыру үшін қолайлы жағдай қалыптастырды. Келесі кезең жоғары деңгейдегі өңдеу өндірістерін дамытуға, заманауи технологияларды енгізуге және өнеркәсіптік кооперацияны кеңейтуге бағытталуы тиіс. Қазақстанның ресурстық әлеуетін, отандық бизнестің тәжірибесін және халықаралық компаниялардың құзыреттерін біріктіру жаңа ауқымды жобаларды жүзеге асыруға, өнеркәсібіміздің бәсекеге қабілеттілігін арттыруға және Қазақстанның ұзақ мерзімді инвестициялық ынтымақтастықтағы сенімді әріптес ретіндегі ұстанымын нығайтуға мүмкіндік беретініне сенімдімін», – деп атап өтті Рүстам Шүнтіков.

Форум аясында Қазақстанның инвестициялық ахуалына, түсті металлургия саласындағы бірлескен жобаларды іске асыруға, шикізатты өңдеу технологияларын дамытуға, саланың экологиялық тұрақты дамуына, инвестициялық жобаларды қаржыландыруға және Қазақстан–Қытай өнеркәсіптік кооперациясын кеңейтуге арналған тақырыптық сессиялар өтті. Талқылауларға екі елдің мемлекеттік органдарының, салалық бірлестіктерінің, даму институттарының, ірі өнеркәсіптік компаниялары мен қаржы ұйымдарының өкілдері қатысты.

Форум Қазақстан мен Қытайдың тау-кен металлургия саласындағы ынтымақтастықты одан әрі кеңейтуге, бірлескен инвестициялық жобаларды іске асыруға, заманауи өндірістерді жергіліктендіруге және ұзақ мерзімді технологиялық әріптестікті нығайтуға өзара мүдделі екенін тағы бір мәрте растады.