Қазақстан–Марокко Іскерлік кеңесінің алғашқы отырысы Касабланкада өтті

2026 жылғы 21 шілдеде Марокко Корольдігінің Касабланка қаласында Қазақстан–Марокко Іскерлік кеңесінің алғашқы отырысы өтті. Іс-шара екі елдің іскер топтары арасындағы сауда-экономикалық және инвестициялық ынтымақтастықты нығайту мақсатында ұйымдастырылды.

Іс-шараға қатысушыларды Қазақстан Республикасы Сыртқы істер министрінің орынбасары Әлібек Қуантыров пен Марокко Корольдігі Кәсіпорындарының жалпы конфедерациясының төрағасы Мехди Тази құттықтау сөздерімен қарсы алды. Сонымен қатар Қазақстан–Марокко Іскерлік кеңесінің тең төрағалары Дрис Беномар мен Қазақстанның Сыртқы сауда палатасы Басқарма төрағасы Мұрат Қарымсақов сөз сөйледі.

Отырысты аша отырып, Мұрат Қарымсақов Қазақстан мен Марокконың өзара тиімді ынтымақтастықты одан әрі кеңейту үшін зор әлеуетке ие екенін атап өтті. Оның айтуынша, Іскерлік кеңестің қызметі бірлескен жобаларды іске асыруға практикалық қолдау көрсетуге, кәсіпкерлер арасындағы тікелей байланыстарды дамытуға және бизнес жүргізудегі қолданыстағы кедергілерді жоюға бағытталуы тиіс.

Өз сөзінде Қазақстанның Сыртқы сауда палатасының басшысы агроөнеркәсіптік кешен, азық-түлік қауіпсіздігін қамтамасыз ету, көлік-логистикалық бағыттарды дамыту, өнеркәсіптік кооперация, цифрлық технологиялар және финтех салаларын қамтитын өзара іс-қимылдың перспективалы бағыттарын таныстырды. Сондай-ақ Қазақстанның транзиттік әлеуеті мен Марокконың порттық инфрақұрылымын пайдалану арқылы Орталық Азия және Батыс Африка нарықтарымен сауда байланыстарын кеңейтуге, сондай-ақ академиялық және гуманитарлық ынтымақтастықты дамытуға ерекше назар аударылды.

«Қазақстан–Марокко Іскерлік кеңесі – бизнес өкілдерінің тікелей диалогын дамытуға, өзара іс-қимылды үйлестіруді жеңілдетуге және кедергілерді жоюға арналған маңызды практикалық құрал. Біз жан-жақты әріптестікке ашықпыз және жобаларыңызды бизнес-идеядан бастап толыққанды іске асыру кезеңіне дейін кешенді сүйемелдеуге дайынбыз», – деп атап өтті Мұрат Қарымсақов.

Отырыс аясында қазақстандық және марокколық компаниялардың өкілдері өз жобаларын таныстырып, ынтымақтастықтың перспективалы бағыттарын талқылады, сондай-ақ екіжақты сауда-экономикалық байланыстарды кеңейту мәселелері бойынша пікір алмасты. Қазақстан тарапынан кездесуге Freedom, LOGSOFT, Samadi A Group, Gelios Tour, Zaru Pantotherapy, Service Management Group, «Ақтөбе кондитер фабрикасы», WebTours, QS Azia Sertik және басқа да компаниялардың өкілдері қатысты. Марокко тарапынан NS AFRIC, Privilege Voyages, FMIIP, ZINE INVEST, PHOENICIA, APEBI, Casablanca Finance City, Al Omra, Химия және парахимия өнеркәсібі федерациясы, FISA Maroc, AIGLE BLEU және басқа да компаниялар ұсынылды.

Қазақстанның Сыртқы сауда палатасы Қазақстан–Марокко Іскерлік кеңесін екі ел кәсіпкерлері арасындағы тікелей өзара іс-қимылды дамытудың тиімді алаңы ретінде қарастырады және бірлескен бастамаларды сүйемелдеу, инвестициялар тарту, сондай-ақ қазақстандық бизнесті Марокко Корольдігінің нарығына ілгерілету бағытындағы жұмыстарды жалғастырады.