Қазақстан мен Қытайдың логистика және өнеркәсіп саласындағы ынтымақтастығы: СІSCE көрмесіне ҚССП қатысуы

2026 жылғы 3 сәуірде Астанада IV China International Supply Chain Expo (CISCE) көрмесінің таныстырылымы және Қазақстан мен Қытай арасындағы жеткізу тізбектері саласындағы ынтымақтастық бойынша семинар өтті. Іс-шараның басты ұйымдастырушылары – Қазақстанның Сыртқы сауда палатасы және CCPIT болды.

Аталған іс-шара логистика, өнеркәсіп және халықаралық сауда салаларындағы кооперацияны дамыту перспективаларын талқылауға арналған маңызды алаңға айналып, екі елдің мемлекеттік органдары, қаржы институттары және бизнес өкілдерін біріктірді. Қатысушылар қатарында Алматыдағы Қытайдың Өнеркәсіп және сауда банкінің бас директоры Люй Хунхай, «Банк ЦентрКредит» АҚ China Desk бизнес-даму бөлімінің жетекшісі Қарлығаш Мыңжасарова, сондай-ақ Қытай Халық Республикасының Қазақстан Республикасындағы Төтенше және Өкілетті Елшісі Хань Чуньлинь болды. Қазақстанның Сыртқы сауда палатасы атынан іс-шараға Басқарма төрағасы Мұрат Қарымсаков қатысты.

Өз сөзінде Мұрат Қарымсаков жаһандық экономиканың стратегиялық трансформациясын және тұрақты даму мен халықаралық бәсекеге қабілеттіліктің негізгі элементі ретінде жеткізу тізбектерінің маңызы артып келе жатқанын атап өтті. «Жеткізу тізбектері әлдеқашан тек логистикалық құрал болудан қалды. Бүгінде бұл – экономикалық тұрақтылықтың негізі, қосылған құнды қайта бөлудің маңызды механизмі және халықаралық бәсекеге қабілеттіліктің негізгі факторларының бірі», – деді ол.

Сонымен қатар, ол Қазақстанның еуразиялық жеткізу тізбектеріндегі стратегиялық рөлін атап өтіп, Қазақстанның Сыртқы сауда палатасы бизнес, мемлекеттік құрылымдар және шетелдік серіктестер арасындағы өзара іс-қимылды қамтамасыз ететін, сондай-ақ іскерлік диалогты нақты жобалар мен тұрақты кооперациялық байланыстарға айналдыратын практикалық әрі үйлестіруші функция атқаратынын жеткізді.

Қазақстандық компаниялардың China International Supply Chain Expo көрмесіне қатысуы Сыртқы сауда палатасы тарапынан сыртқы нарықтарға шығудың, қытайлық және халықаралық серіктестермен тікелей байланыс орнатудың, сондай-ақ нақты өндірістік және логистикалық тізбектерге қосылудың тиімді құралы ретінде қарастырылатыны ерекше атап өтілді. Осыған байланысты Палата отандық компаниялар пулын қалыптастыруға, іскерлік делегациялар ұйымдастыруға, келіссөздер процесін сүйемелдеуге және қол жеткізілген уағдаластықтарды дамытуға жәрдемдесуге дайын.

Іс-шара аясында China International Exhibition Center Group Limited пен Қазақстанның Сыртқы сауда палатасы арасында ынтымақтастық туралы меморандумға қол қою рәсімі өтті. Құжат IV China International Supply Chain Expo көрмесіне қатысушылар мен келушілерді тарту мақсатында ынтымақтастық қарым-қатынастар орнатуды, сондай-ақ көрмені ілгерілету, дайындық жұмыстарын үйлестіру және бизнестің қатысуын кеңейту үшін қолайлы жағдайлар жасау бағытында өзара қолдауды көздейді.

Бағдарламаға сондай-ақ IV China International Supply Chain Expo мүмкіндіктерінің таныстырылымы және халықаралық компаниялар, салалық қауымдастықтар мен мемлекеттік органдар өкілдерінің қатысуымен Қазақстан мен Қытай арасындағы жеткізу тізбектері саласындағы ынтымақтастық перспективаларына арналған панельдік пікірталас кірді.

Қазақстанның Сыртқы сауда палатасының осы іс-шараны ұйымдастыруы мен оған қатысуы оның халықаралық экономикалық ынтымақтастықты дамытудағы, қазақстандық бизнесті сыртқы нарықтарға ілгерілетудегі және еуразиялық кеңістікте тұрақты кооперациялық байланыстар қалыптастырудағы белсенді рөлін растайды.