Қазақстан мен Цзянсу провинциясының бизнесі ынтымақтастықты кеңейтуге ниетті

12 маусым күні Астанада Қазақстан Республикасы мен Қытай Халық Республикасының мемлекеттік органдарының, іскерлік қауымдастықтары мен бизнес өкілдерінің басын қосқан «Қазақстан – Қытай (Цзянсу): сауда-экономикалық ынтымақтастық жөніндегі конференция» өтті. Бағдарламаның негізгі бөлігі қазақстандық компаниялар мен Қытайдың жетекші экономикалық, өнеркәсіптік және инновациялық өңірлерінің бірі саналатын Цзянсу провинциясының кәсіпорындары арасындағы B2B кездесулер болды.

Қазақстанның Сыртқы сауда палатасы іс-шараның тең ұйымдастырушысы ретінде отандық бизнес өкілдерінің қытайлық серіктестермен келіссөздерге қатысуын қамтамасыз етті. Конференцияға Цзянсу провинциясы Үкіметінің өкілдері, салалық бірлестіктер, іскерлік қауымдастықтар мен екі елдің кәсіпкерлері қатысты.

Конференция қатысушыларына Астана қаласы Кәсіпкерлер палатасының директоры Қанат Алин құттықтау сөз сөйледі. Өз сөзінде ол Қазақстан мен Қытай арасындағы қарым-қатынастардың жоғары деңгейде дамып отырғанын және өзара сенімнің, тату көршілік пен стратегиялық әріптестіктің жарқын үлгісі екенін атап өтті. Сондай-ақ өңіраралық өзара іс-қимылдың инвестициялық бастамаларды дамытуға, бірлескен кәсіпорындар құруға және нақты жобаларды іске асыруға ықпал ететінін айтты.

Кездесу барысында Қытайдың ең дамыған әрі бәсекеге қабілетті өңірлерінің бірі саналатын Цзянсу провинциясының әлеуетіне ерекше назар аударылды. Провинция өнеркәсіп, машина жасау, жоғары технологиялар, цифрлық экономика және ғылыми зерттеулер салаларындағы жетістіктерімен танымал. Қазақстан үшін қытайлық серіктестердің тәжірибесі мен құзыреттері экономиканы жаңғырту және әртараптандыру тұрғысынан ерекше маңызға ие.

Конференция аясында машина жасау, энергетика, құрылыс, логистика, цифрлық технологиялар, жаңа материалдар өндірісі, агроөнеркәсіптік кешен және қаржы секторы сияқты салалардағы ынтымақтастық мүмкіндіктері таныстырылды. Қатысушылар өндірісті жергіліктендіру, технологиялар трансфері, инженерлік құзыреттерді дамыту, кадрлар даярлау және жаңа өндірістік тізбектер қалыптастыру мәселелерін талқылады.

Тараптар Қазақстан мен Қытайдың бірлескен индустриялық және инвестициялық жобаларды іске асыру үшін зор әлеуетке ие екенін атап өтті. Қазақстан көлік-логистикалық инфрақұрылымды жүйелі түрде дамытып, Азия мен Еуропаны байланыстыратын маңызды транзиттік хаб ретіндегі позициясын нығайтып келеді. Бұл өз кезегінде іскерлік ынтымақтастықты кеңейтуге қосымша мүмкіндіктер ашады.

Конференция қазақстандық кәсіпкерлер мен Цзянсу провинциясының бизнес өкілдері арасында жаңа іскерлік байланыстар орнатуға және ынтымақтастықтың перспективалы бағыттарын талқылауға арналған маңызды алаңға айналды. Қатысушылар ұзақ мерзімді әріптестікті дамытуға, бірлескен жобаларды іске асыруға және инвестициялық ынтымақтастықты кеңейтуге қызығушылық білдірді.