Қазақстанның Сыртқы сауда палатасы мен Куба Республикасының Төтенше және Өкілетті Елшісінің кездесуі өтті

2025 жылғы 14 мамырда «Атамекен» ҰКП ғимаратында Қазақстанның Сыртқы сауда палатасы мен Қазақстан Республикасындағы Куба Республикасының Төтенше және Өкілетті Елшісі Оскар Сантана Леон арасындағы жұмыс кездесуі өтті. Кездесудің басты мақсаты – іскерлік ынтымақтастықтың перспективаларын талқылау, сондай-ақ екі елдің палаталары арасындағы өзара түсіністік пен ынтымақтастық туралы меморандумның ағымдағы жай-күйін қарастыру болды.

Тараптар сауда-экономикалық байланыстарды тереңдетудің мүмкін бағыттарын талқылап, екіжақты ынтымақтастықтың өзекті мәселелері бойынша пікір алмасты және бизнес саласындағы мемлекетаралық диалогты дамыту бойынша нақты қадамдарды белгіледі.

Қазақстанның Сыртқы сауда палатасы тарапынан кездесуге Аппарат басшысы Асан Жәкішев қатысты. Ол Кубамен серіктестікті дамытуға ВПК-ның мүдделілігін атап өтті: «Қазақстанның Сыртқы сауда палатасы халықаралық ынтымақтастық географиясын кеңейту бағытында жүйелі түрде жұмыс жүргізуде. Біз Кубамен экономикалық байланыстарды тереңдетудің әлеуетін көріп отырмыз. 2024 жылы екіжақты тауар айналымы 87,2 мың АҚШ долларын құрады, ал 2025 жылдың алғашқы екі айының өзінде бұл көрсеткіш 185 мың АҚШ долларына жетті. Қазақстан Кубадан қант құрағын, сигаралар мен этил спиртін импорттайды, бұл бағыттарды одан әрі кеңейтуге болады», – деп атап өтті Асан Жәкішев.

Өз кезегінде Оскар Сантана Леон екіжақты ынтымақтастықты жандандыруға мүдделілік білдіріп, соның ішінде кубалық кәсіпкерлердің Қазақстанға және қазақстандық бизнес-қоғамдастық өкілдерінің Кубаға іскерлік сапарларын ұйымдастыру арқылы өзара әрекеттестікті арттыруға дайын екенін жеткізді. Сонымен қатар, бірлескен жобаларды жүзеге асыруға, инвестициялық ынтымақтастық пен туризмді дамытуға дайындығын білдірді. Атап айтқанда, Қазақстаннан ауыл шаруашылығы өнімдерін — бидай мен өсімдік майын импорттаудың әлеуеті ерекше назарға алынды.