Салалық ынтымақтастық және жаңа жобалар: Қырғызстандағы форум ЕАЭО үшін маңызды кезең болды

«Атамекен» ҚР Ұлттық кәсіпкерлер палатасы Президиум Төрағасы Хатшылығының басшысы – Басқарма мүшесі Мұрат Қарымсақов 2025 жылғы 13 тамызда Бостериде өткен «Қырғыз Республикасының ЕАЭО-ға кіруінің 10 жылдығы» атты ғылыми-практикалық конференция аясындағы VII Қырғыз-Ресей экономикалық форумына қатысты.

Іс-шараға ЕАЭО елдерінің мемлекеттік билік органдарының өкілдері, іскер топтар, ғылыми және сарапшылық қауымдастық мүшелері жиналды. Форум екіжақты және көпжақты экономикалық өзара іс-қимылдың өзекті мәселелерін талқылауға, ынтымақтастықтың жаңа форматтарын іздеуге және серіктестік байланыстарды нығайтуға арналған маңызды алаңға айналды.

Жұмыс барысында өнеркәсіп, агроөнеркәсіп кешені, көлік және логистика, цифрлық экономика, креативті индустриялар, шағын және орта бизнесті дамыту сияқты салалардағы өзара іс-қимыл перспективалары талқыланды. Қатысушылар бірлескен өндірістер құру, инновациялық технологияларды енгізу, тауар айналымын кеңейту және өзара сауданы жеңілдету мүмкіндіктеріне назар аударды.

Бөлек бағыт ретінде инвестицияларды ынталандыру, тауарлар мен қызметтердің қозғалысы жолындағы кедергілерді азайту, сондай-ақ Одақ елдерінің бәсекеге қабілеттілігін арттыру үшін көлік-логистикалық инфрақұрылымды дамыту мәселелері қаралды. Ерекше көңіл бірыңғай инновациялық кеңістік қалыптастыруға, стартаптарды қолдауға және жаңа буын кадрларын даярлау үшін білім беру бастамаларын іске асыруға бөлінді.

Статистика интеграцияның оң серпінін растайды: 2024 жылы ЕАЭО елдері арасындағы өзара сауда көлемі 98,3 млрд АҚШ долларына жуықтады, ал 2025 жылы Одақ 100 млрд долларлық межеге жақындап қалды. Қазақстан үшін ЕАЭО-ға мүше болған уақыттан бері бұл көрсеткіш 87,1%-ға өсіп, 2015 жылғы 16,3 млрд доллардан 2024 жылы 30,5 млрд долларға жетті. Одақ елдеріне экспорт 115,7%-ға өсіп, 11 млрд долларды құрады. ЕАЭО-ның жалпы сыртқы сауда айналымындағы өзара сауда үлесі 13,5%-дан 19,8%-ға дейін көтеріліп, экономикалық байланыстардың нығайғанын көрсетті.

Мұрат Қарымсақов атап өтті: «Еуразиялық интеграция қазақстандық бизнеске жаңа нарықтарға, технологияларға және серіктестерге қол жеткізуге мүмкіндік береді. Бүгінде өнеркәсіп, агроөнеркәсіп кешені, логистика және цифрлық саладағы бірлескен жобалар тек жекелеген компаниялар үшін ғана емес, Одақ елдері экономикасы үшін де өсім драйверіне айнала алады. «Атамекен» ҚР ҰКП іскерлік байланыстарды дамытуға, B2B-кездесулер ұйымдастыруға және перспективалы бастамаларды жүзеге асыруға қолдау көрсетуге дайын».

Форум қорытындысы бойынша тараптар жаңа жобаларды іске қосу, кооперацияны кеңейту және ЕАЭО елдерінің әлемдік нарықтардағы позицияларын нығайту бойынша бірлескен жұмысты жалғастыруға дайын екендіктерін білдірді.