Қазақстан Экономикалық ынтымақтастық ұйымының 17-саммитіне қатысты

4 шілде күні Әзербайжанның Ханкенди қаласында өткен Экономикалық ынтымақтастық ұйымының (ЭЫҰ) 17-саммитіне Қазақстанның Сыртқы сауда палатасының Басқарма мүшесі – Аппарат басшысы Асан Жәкішев қатысты.

Форумға Әзербайжан Республикасының Президенті Ильхам Әлиев төрағалық етті. Саммитке мүше мемлекеттердің мемлекет және үкімет басшылары қатысты. Атап айтқанда: Иран Ислам Республикасының Президенті Масуд Пезешкиан, Қырғыз Республикасы Президенті Садыр Жапаров, Тәжікстан Республикасы Президенті Эмомали Рахмон, Түркия Республикасы Президенті Режеп Тайип Ердоған, Қазақстан Республикасы Премьер-Министрі Олжас Бектенов, Пәкістан Ислам Республикасының Премьер-Министрі Шахбаз Шариф, Түрікменстан Министрлер Кабинеті Төрағасының орынбасары – Сыртқы істер министрі Рашид Мередов, Ауғанстан Премьер-Министрінің міндетін атқарушы орынбасары Мулла Абдул Ғани Барадар, сондай-ақ ЭЫҰ Бас хатшысы Асад Маджид Хан және басқа да елдер мен өңірлік ұйымдардың делегация басшылары қатысты.

Қатысушылар халықаралық және өңірлік өзекті мәселелерді, сондай-ақ Ұйым аясында көпжақты серіктестікті одан әрі нығайту жолдарын талқылады.

Қазақстан Республикасының Премьер-Министрі Олжас Бектенов ЭЫҰ саммитін жоғары деңгейде ұйымдастырғаны үшін ризашылығын білдірді. «Саммиттің дәл Ханкенди қаласында өтуі – Әзербайжанның бейбіт даму, тұрақтылық пен ынтымақтастыққа ұмтылысын білдіреді. Бұл – өңірлік диалогты нығайту жолындағы маңызды қадам. Әзербайжан бауырлас ел ретінде экономикалық кеңістікте лайықты орын алып, негізгі даму бағыттары бойынша көшбасшылардың қатарында», – деді ол.

Қазақстанның Сыртқы сауда палатасы ЭЫҰ мүше елдерімен орнықты экономикалық өсімді ілгерілету, өңірлік кооперацияны дамыту және бүкіл өңірдің игілігі үшін бірлескен бастамаларды жүзеге асыру мақсатында ынтымақтастықты нығайтуды жалғастырады.