ҚССП Валенсиядағы Eurochambres кездесуінде еуропалық бизнеспен ынтымақтастық перспективаларын таныстырды

2026 жылғы 30 қыркүйекте Испанияның Валенсия қаласында Eurochambres 2026 конгресі аясында ұйымдастырылған «Eurochambres — Орталық Азия» жоғары деңгейдегі іскерлік таңғы асына Қазақстанның Сыртқы сауда палатасы Басқарма төрағасының кеңесшісі — Халықаралық ынтымақтастық департаменті директорының орынбасары Дана Қасымова қатысты.

Кездесу Eurochambres басшылығын, Еуропалық одақтың, Қазақстан, Қырғызстан, Тәжікстан және Өзбекстан сауда-өнеркәсіп палаталарының өкілдерін, сондай-ақ еуропалық іскер топтарды біріктірді. Еуропа мен Орталық Азия арасындағы сауда-экономикалық байланыстарды дамыту, инвестициялық ынтымақтастық және палаталар арасындағы өзара іс-қимылды нығайту мәселелері басты назарда болды.

Eurochambres президенті Владимир Длоуги және ЕО-ның Орталық Азия бойынша арнайы өкілі Эдуард Стипрайс құттықтау сөз сөйледі. Қатысушылар қатарында Eurochambres президентінің орынбасары, Латвия Сауда-өнеркәсіп палатасының президенті Айгарс Ростовскис, Eurochambres бас директоры Бен Баттерс, сондай-ақ Бельгия, Германия, Польша, Испания, Түркия, Украина және Грузия палаталарының өкілдері болды.

Дана Қасымова өз сөзінде «Атамекен» ҚР Ұлттық кәсіпкерлер палатасы мен Қазақстанның Сыртқы сауда палатасы қызметінің негізгі бағыттарын, елдің инвестициялық мүмкіндіктерін және еуропалық серіктестермен ынтымақтастықтың перспективалы салаларын таныстырды. Қазақстанның Еуропалық одақпен сауда қатынастарына ерекше назар аударылды. Баяндамада келтірілген деректерге сәйкес, Орталық Азия елдерінің ЕО-мен жалпы тауар айналымының шамамен 80%-ы Қазақстанға тиесілі, ал 2025 жылдың қорытындысы бойынша өзара сауда көлемі 45 млрд АҚШ долларынан асты. Шикізат пен ауыл шаруашылығы өнімдерін жеткізумен қатар, өнеркәсіптік кооперация, көлік және логистика, цифрлық технологиялар, жасыл энергетика және аса маңызды минералдар салаларындағы өзара іс-қимыл перспективалы бағыттар болып табылады.

Дана Қасымова тұрақты инфрақұрылымды, энергетиканы және цифрлық өзара байланысты дамытуға бағытталған еуропалық Global Gateway стратегиясы мен Team Europe тәсілі аясындағы ынтымақтастықты атап өтті. Қазақстан үшін бұл бағыттар Транскаспий халықаралық көлік бағытын — Орта дәлізді дамытумен, цифрлық қызметтерге қолжетімділікті кеңейтумен, сондай-ақ су ресурстары, энергетика және климаттың өзгеруі салаларындағы өңірлік бастамаларды іске асырумен байланысты.

Өнеркәсіптік ынтымақтастықтың мысалдары ретінде теміржолдың жылжымалы құрамын жаңарту саласындағы Stadler Rail AG компаниясымен өзара іс-қимыл және Қазақстанда еуропалық ауыл шаруашылығы техникасын өндіру жобалары ұсынылды. Аса маңызды шикізат материалдары, өңдеу және тау-кен металлургия кешенін жаңғырту салаларындағы серіктестік әлеуеті жеке атап өтілді. Еліміздің өңірлерінде немістің ауыл шаруашылығы техникасын (CLAAS, HORSCH, AMAZONE) құрастыру және жетекші еуропалық брендтердің ауқымды инвестициялық жобалары да өнеркәсіптік кооперацияның жарқын мысалдары болып табылады.

Сөз барысында Қазақстан мен Испания арасындағы іскерлік байланыстар да қамтылды. Ұсынылған деректерге сәйкес, 2025 жылы екі ел арасындағы тауар айналымы шамамен 2 млрд АҚШ долларын, ал 2005–2025 жылдар аралығында тартылған испан инвестицияларының көлемі шамамен 345 млн АҚШ долларын құрады. Қазақстанда испан капиталының қатысуымен 62 компания тіркелген, олардың қатарында Xcalibur Multiphysics Group, Técnicas Reunidas және басқа да компаниялар бар. Екі ел кәсіпкерлерінің өзара іс-қимылына ықпал ететін Қазақстан-Испания іскерлік кеңесі ынтымақтастықты нығайту тетіктерінің бірі болып табылады.

Дана Қасымова Палатаның еуропалық палаталар желісімен өзара іс-қимылды дамытуға және кәсіпорындар арасында тікелей байланыстар орнатуға жәрдемдесуге дайын екенін атап өтті. Мұндай ынтымақтастық қазақстандық өнімді ілгерілетуге, инвестициялар тартуға және бірлескен жобаларды іске асыруға қосымша мүмкіндіктер ашады.

Іскерлік таңғы ас бағдарламасы Орталық Азия елдері палаталарының таныстырылымдарын, ашық пікірталасты және Eurochambres пен еуропалық сауда-өнеркәсіп палаталарының өкілдерімен іскерлік қарым-қатынасты қамтыды.