Қазақстанның Сыртқы сауда палатасы Қытайдың гүл индустриясындағы жетекші компаниялармен келіссөздер жүргізді

Қазақстанның Сыртқы сауда палатасы Коммерциялық қызмет департаменті директорының орынбасары Мадина Есдәулетованың қатысуымен Қытай Халық Республикасының гүл индустриясындағы жетекші компанияларының өкілдерімен жұмыс кездесуін өткізді. Бұл компаниялар гүл өнімдерін өндіру мен экспорттаудың әлемдегі ірі орталықтарының бірі саналатын Юньнань провинциясында орналасқан.

Келіссөздер барысында бірқатар салалық ұйымдар мен компаниялармен сындарлы пікір алмасу өтті, олардың қатарында:
— Hongri Fresh Flower Planting Co., Ltd.;
— «Kunming Huaibao Technologies» ЖШС (HUAEB);
— «Kunming Sanlin Flowers» ЖШС;
— «Yunnan Chuhua Modern Agricultural Development Group» ЖШС;
— «Yunnan Huizhong Agriculture» ЖШС;
— «Yunnan Luyilin Horticulture» ЖШС (Softdream);
— Юньнань гүл индустриясы қауымдастығы (YNFA).

Тараптар агроөнеркәсіптік кешен саласындағы екіжақты ынтымақтастықты дамыту перспективаларын, атап айтқанда гүл өсіру, өңдеу, логистика және жеткізу бағыттарын, сондай-ақ қазақстандық компанияларды жаһандық жеткізу тізбектеріне кіріктіру мүмкіндіктерін талқылады.

Келесі негізгі мәселелерге ерекше назар аударылды:
— гүл өнімдерін Қазақстанға және Орталық Азия елдеріне жеткізуді ұйымдастыру;
— бірлескен логистикалық және сауда платформаларын құру;
— гүл өсіру және сақтау саласындағы технологиялармен алмасу;
— екі елдің бизнес-қоғамдастықтары арасында B2B байланыстарды дамыту;
— қазақстандық компаниялардың Қытайдағы халықаралық көрмелер мен сауда миссияларына қатысуы.

Кездесу қорытындысы бойынша нақты коммерциялық жобаларды пысықтауды, сондай-ақ өзара іскерлік сапарларды ұйымдастыруды қамтитын тұрақты әріптестік өзара іс-қимылды жолға қою жөнінде келісімдерге қол жеткізілді.

Қазақстанның Сыртқы сауда палатасы қытайлық серіктестермен тікелей байланыстарды дамытуда бизнеске жан-жақты қолдау көрсетуге дайын екенін растады. Бұл қолдау келіссөздерді сүйемелдеуді, B2B және B2G кездесулерін ұйымдастыруды, сондай-ақ көрмелер мен іскерлік іс-шараларға арналған тауарларды уақытша әкелуді жеңілдететін халықаралық кедендік құжат – Карнет АТА сияқты сыртқы экономикалық қызмет құралдарын пайдалануды қамтиды.

Өткізілген келіссөздер Қазақстан мен Қытай арасындағы сауда-экономикалық ынтымақтастықты дамытудағы маңызды қадам болды және импортты әртараптандыруға, гүл индустриясын дамытуға, сондай-ақ қазақстандық бизнестің халықаралық нарықтардағы позициясын нығайтуға жаңа мүмкіндіктер ашады.