Қазақстанның сыртқы сауда палатасы Санья қаласында қазақстандық бизнесті қолдау үшін өкілдік ашты

2025 жылғы 28 тамызда Қытайдың Хайнань провинциясындағы Санья қаласында өткен Халықаралық іскерлік саммит аясында Қазақстанның сыртқы сауда палатасының (ҚССП) өкілдігі ресми түрде ашылды.

Жаңа өкілдік Қытай нарығына шығуға мүдделі қазақстандық компанияларды қолдаудың негізгі алаңына айналмақ. Ол бизнес-миссияларды, көрмелерді ұйымдастыруға, экспорттаушыларға кеңес беруге және мәдени-экономикалық бастамаларды ілгерілетуге жәрдемдеседі.

Ашылу рәсімінде Қазақстанның сыртқы сауда палатасының Басқарма Төрағасы Мұрат Қарымсақов құттықтау сөз сөйледі. Ол Саньядағы өкілдіктің құрылуы Қазақстан мен Қытай арасындағы ынтымақтастықты дамытудың маңызды қадамы екенін атап өтті: «Біздің өкілдік отандық кәсіпкерлерге Қытайдан жаңа мүмкіндіктер табуға көмектесіп қана қоймай, бірлескен жобаларды іске қосуға, тәжірибе алмасуға және логистика мен ауыл шаруашылығынан бастап креативті индустриялар мен туризмге дейінгі болашағы зор бағыттарды дамытуға арналған алаңға айналады. Бұл шешім бизнестің жаңа көкжиектерін ашып, өзара байланыстарды нығайтады деп сенеміз».

Өз сөзінде Мұрат Қарымсақов қазіргі таңда креативті индустриялар әлемдік ЖІӨ-нің 3%-дан астамын құрайтынын атап өтті. Қазақстан мен Қытай этнодизайн, қолөнер, гастрономия және туризм салаларында зор әлеуетке ие. 2024 жылдың қорытындысы бойынша екі ел арасындағы тауар айналымы 43,8 млрд АҚШ долларына жетті, ал 2030 жылға дейін бұл көрсеткішті екі есеге арттыру міндеті қойылды.

Сонымен қатар, ол ынтымақтастықтың төрт негізгі бағытын белгіледі:

• логистика және көлік дәліздері — жүк ағындарын жеделдету және рәсімдерді цифрландыру;
• ауыл шаруашылығы және азық-түлік қауіпсіздігі а— тұрақты жеткізу тізбектерін қалыптастыру;
• жасыл энергетика және орнықты даму — жаңартылатын энергия көздері саласындағы бірлескен жобалар;
• мәдени-креативті индустриялар — қолөнерді, этнодизайнды, гастрономияны және туризмді дамыту.

Санья қаласында өкілдіктің ашылуы екі ел арасындағы іскерлік байланыстарды нақты мазмұнмен толықтырып, қазақстандық кәсіпкерлер үшін жаңа мүмкіндіктердің бастауы болды.