Астанада Қазақстан-Норвегия Іскерлік кеңесінің екінші отырысы өтті

21 мамыр күні Астанада Қазақстанның Сыртқы сауда палатасы мен Норвегияның Шығыс сауда-өнеркәсіп палатасы екі елдің елшіліктерінің қолдауымен ұйымдастырған Қазақстан-Норвегия Іскерлік кеңесінің екінші отырысы өтті. Алаң екі елдің мемлекеттік құрылымдары, бизнес, даму институттары мен бейінді компанияларының өкілдерін біріктіріп, екіжақты сауда-экономикалық және инвестициялық ынтымақтастық перспективаларын талқылауға мүмкіндік берді. 

Ашылу рәсімінде Қазақстан тарапының Іскерлік кеңес төрағасы, Қазақстанның Сыртқы сауда палатасы Басқарма төрағасы Мұрат Қарымсақов, EAST CCI of Norway Директорлар кеңесінің төрағасы Ронни Солберг, Қазақстан Республикасының Норвегия Корольдігіндегі Төтенше және Өкілетті Елшісі Әділ Тұрсынов, сондай-ақ Норвегияның Шығыс сауда-өнеркәсіп палатасының Басқарма мүшесі, Eksfin компаниясының бас заң кеңесшісі Столе Торгерсбротен құттықтау сөз сөйледі. 

Мұрат Қарымсақов өз сөзінде соңғы жылдары Қазақстан мен Норвегия арасындағы экономикалық байланыстардың айтарлықтай жанданғанын атап өтті. 2025 жылы екі ел арасындағы өзара сауда көлемі 37%-ға өсіп, шамамен 170 млн АҚШ долларын құрады. Бұл көрсеткіштер тауар ағындарының кеңейгенін, ынтымақтастық үшін жаңа бағыттардың пайда болғанын және ең бастысы, екі елдің кәсіпкерлері мен институттары арасында сенімнің қалыптасып келе жатқанын көрсетеді. 

Отырыс аясында энергетика және мұнай-газ саласы, ауыл шаруашылығы мен акваөсіру, сондай-ақ логистика және тұрақты инфрақұрылым салаларындағы өзара іс-қимылдың негізгі бағыттары қаралды. 

Қазақстандық және норвегиялық компаниялар арасындағы практикалық кооперация әлеуетіне ерекше назар аударылды. ВПК басшысының айтуынша, бүгінде Қазақстанда норвегиялық қатысуы бар 18 компания тіркелген (Jotun, Mill), ал норвегиялық бизнестің қазақстандық серіктестермен ынтымақтастыққа қызығушылығы артып келеді. 

Іскерлік бағдарламаға Gexcon, Optimar, Jotun, Waister AS, Cambi, Eksfin Агенттігі, Creative&Innovation Institute, KazTransCompany және «KIT» ЗТБ сияқты компаниялар мен ұйымдардың өкілдері қатысты. 

Мұрат Қарымсақов логистикалық ынтымақтастықтың маңыздылығын да атап өтіп, Қазақстан Еуразияның негізгі транзиттік хабы екенін және Қытай мен Еуропа арасындағы құрлықтағы транзиттің шамамен 70%-ын қамтамасыз ететінін айтты. Бұл, соның ішінде Орта дәліз бойында бірлескен инфрақұрылымдық және көлік жобаларын дамытуға қосымша мүмкіндіктер ашады. 

Іс-шара қорытындысы бойынша акваөсіру және балық өнімдерін өңдеу саласындағы ынтымақтастықты одан әрі дамытуға бағытталған «Organic Fish» ЖШС мен норвегиялық «Optimar» компаниясы арасында өзара түсіністік туралы меморандумға қол қою рәсімі өтті. 

Қазақстанның Сыртқы сауда палатасы халықаралық іскерлік байланыстарды дамыту, экспортқа бағдарланған бизнесті қолдау және қазақстандық әрі шетелдік компаниялар арасындағы практикалық өзара іс-қимылға арналған жаңа алаңдар құру бағытындағы жүйелі жұмысын жалғастыруда.