ҚССП Нидерланд делегациясымен аграрлық ынтымақтастықты дамыту және экспортты кеңейту мәселелерін талқылады

2026 жылғы 9 сәуірде Астана қаласында Қазақстанның Сыртқы сауда палатасы Басқарма төрағасы Мұрат Қарымсақовтың және Нидерланд Корольдігінің ресми делегациясының қатысуымен жұмыс кездесуі өтті.

Нидерланд делегациясының құрамында Нидерландтың Ауыл шаруашылығы, балық шаруашылығы, азық-түлік қауіпсіздігі және табиғат министрлігінің бас фитосанитарлық инспекторының орынбасары Лианн Керсберген, сондай-ақ Азық-түлік өнімдері мен тұтыну тауарлары қауіпсіздігі жөніндегі басқарманың (NVWA) өсімдіктер денсаулығы және фитосанитарлық бақылау мәселелері бойынша аға сарапшысы Йерун Кавеларс болды. Кездесуге сондай-ақ Kazakh Invest және Қазақстан Республикасы Ауыл шаруашылығы министрлігінің өкілдері қатысты.

Кездесу барысында тараптар екіжақты сауда-экономикалық ынтымақтастықтың қазіргі жай-күйі мен даму перспективаларын талқылап, агроөнеркәсіптік секторға, фитосанитарлық реттеуге және ауыл шаруашылығы өнімдерінің экспортын ұлғайтуға басымдық берді.

Келіссөздер аясында келесі негізгі бағыттарға ерекше назар аударылды:

— ауыл шаруашылығы өнімдерімен өзара сауданы кеңейту, оның ішінде ет және өңделген өнімдер экспортын арттыру, мал шаруашылығын дамыту, сондай-ақ Ұлытау өңірінің әлеуетін тиімді пайдалану;

— жылыжай шаруашылығы мен агроөндірісте нидерландтық озық технологияларды енгізу;

— жоғары технологиялық өңдеу өндірістерін құру, оның ішінде тұйық цикл негізіндегі жүн өңдеу жобасын іске асыру;

— Еуропалық одақ нарығына шығу кезіндегі кедергілерді азайту, оның ішінде GlobalG.A.P. және HACCP стандарттарына бейімделу, зертханалық инфрақұрылымды дамыту және экспорттаушыларды қолдауды күшейту;

— адами капиталды дамыту, оның ішінде қазақстандық мамандарды Нидерландта оқыту мен тағылымдамадан өткізу, сондай-ақ білім беру ұйымдарымен өзара іс-қимылды кеңейту;

— іскерлік диалогты жүйелі дамыту, оның ішінде бизнес-миссияларды ұйымдастыру және цифрлық B2B платформаларды ілгерілету.

Сонымен қатар Қазақстанның қолайлы географиялық орналасуы мен жоғары аграрлық әлеуетінің арқасында өңірлік азық-түлік қауіпсіздігі мен транзиттік сауданың маңызды орталығы ретіндегі рөлі атап өтілді.

Өз сөзінде Мұрат Қарымсақов: «Елдеріміз арасында берік сауда негізі қалыптасқанымен, экспорт құрылымы әртараптандыруды талап етеді. Басты міндет — қосылған құны жоғары өнімдердің, соның ішінде ауыл шаруашылығы өнімдерінің экспортын ұлғайту және агроөнеркәсіп пен фитосанитарлық реттеу салаларындағы практикалық ынтымақтастықты кеңейту», — деп атап өтті.

Кездесу барысында сондай-ақ «Атамекен» Қазақстан Республикасының Ұлттық кәсіпкерлер палатасының бизнеске қолдау көрсететін негізгі институт ретіндегі қызметі таныстырылды. Қазіргі уақытта «Осы жерде және қазір» ұлттық цифрлық инвестициялық платформасында жалпы сомасы шамамен 120 млрд АҚШ долларын құрайтын 1 600-ден астам жоба тіркелген. Бұл Қазақстанның жоғары инвестициялық әлеуетін және халықаралық серіктестер тарапынан қызығушылықтың артып келе жатқанын айқын көрсетеді.

Кездесу қорытындысы бойынша тараптар ынтымақтастықты одан әрі тереңдетуге, инвестициялық өзара іс-қимылды кеңейтуге және агроөнеркәсіптік кешенде бірлескен жобаларды іске асыруға өзара мүдделілігін растады.