Астанада санкцияларды бақылау және стратегиялық тауарлар саудасы бойынша семинар өтуде

2026 жылғы 12–13 ақпанда Астанада «Санкциялық бақылау және стратегиялық тауарлар саудасы» тақырыбында оқу семинары өтуде. Іс-шараны Қазақстан Республикасындағы Америка Құрама Штаттарының Елшілігі АҚШ Мемлекеттік департаментінің Экспорттық бақылау және шекара қауіпсіздігі (EXBS) бағдарламасының қолдауымен, K2 Integrity және Institute of Financial Integrity (IFI) серіктестігімен ұйымдастырды.

Семинар жұмысына мемлекеттік органдардың, логистика және тасымалдау, экспорттық бақылау мен лицензиялауға жауапты ұлттық компаниялардың өкілдері, сондай-ақ Қазақстанның Сыртқы сауда палатасының өкілдері қатысуда: Халықаралық ынтымақтастық департаментінің директоры Диана Жакутова, Халықаралық ынтымақтастық департаментінің менеджері Айжан Кошенова және Коммерциялық қызмет департаментінің менеджері Адиль Мухамедьяров.

Семинар спикерлері – санкциялық реттеу және экспорттық бақылау саласындағы халықаралық сарапшылар, олардың қатарында Грант Кент (АҚШ), Софи Дэвис (Жаңа Зеландия) және Амир Фадави (АҚШ) бар. Олар санкциялық тетіктерді қолдану, комплаенс құралдары мен халықаралық саудадағы тәуекелдерді басқару бойынша практикалық тәжірибелерімен бөлісуде.

Семинардың мақсаты – көпжақты санкциялар мен сауданы бақылау тетіктері туралы хабардарлықты арттыру, сондай-ақ жаһандық сауда жағдайында санкциялық тәуекелдерді басқарудың практикалық дағдыларын дамыту. Бағдарлама санкциялардың табиғаты мен стратегиялық тауарлар саудасын бақылау механизмдерін талқылауды, Ресейге, Иранға, Солтүстік Кореяға және Қытайға қатысты санкциялық режимдерді терең талдауды, сондай-ақ санкциялардан жалтару тәсілдері мен олардың салдарын жеңілдету стратегияларын қарастыруды қамтиды. Жеке бөлім Institute of Financial Integrity әзірлеген санкциялар жөніндегі аналитикалық жүйеге және санкциялық тәуекелдерді анықтау, бағалау және басқару бойынша практикалық жаттығуларға арналған.

Семинар аясында қатысушыларға курсты аяқтағаны туралы сертификаттар табысталады, сондай-ақ IFI қаржылық тұтастық онлайн-платформасына (DOLFIN) бір жылдық қолжетімділік беріледі, оның ішінде Certified Risk Management Specialist – Global Sanctions (CRMS-GS) тәуекелдерді басқару бойынша сертификатталған бағдарламасын пайдалану мүмкіндігі бар.

Қазақстанның Сыртқы сауда палатасы халықаралық сауда нормаларын сақтау, комплаенс мәдениетін дамыту және халықаралық сауда мен санкциялық реттеу саласындағы кәсіби сараптаманы нығайту мәселелеріне жүйелі түрде көңіл бөледі. Осындай білім беру бастамаларына қатысу қазақстандық компаниялардың сыртқы тәуекелдерге төзімділігін арттыруға және олардың халықаралық нарықтардағы бәсекеге қабілеттілігін нығайтуға ықпал етеді.