CCPIT Shaanxi делегациясымен кездесу өтті

2026 жылғы 22 сәуірде Қазақстанның Сыртқы сауда палатасы Шэньси провинциясының халықаралық сауданы дамытуға жәрдемдесу комитетінің (CCPIT Shaanxi) өкілдерімен және аталған провинцияның төрт жетекші компаниясымен жұмыс кездесуін өткізді. Кездесуді Қазақстанның Сыртқы сауда палатасының Коммерциялық қызмет департаменті директорының орынбасары Мадина Есдәулетова жүргізді.

Кездесу барысында Қазақстан мен Шэньси провинциясы арасындағы сауда-экономикалық ынтымақтастықты кеңейтудің практикалық тетіктері, сондай-ақ Қытай Халық Республикасының Сиань қаласында өтетін «Жібек жолы» 10-шы халықаралық көрмесі аясында ұйымдастырылатын 2026 Exchange & Matching Conference of International Chambers of Commerce іс-шарасына қатысу мәселелері талқыланды. Қазақстандық компаниялардың Қытай нарығына шығуына тиімді алаң қалыптастыруға, нәтижелі B2B-келіссөздер ұйымдастыруға және отандық өнімді ілгерілетуге ерекше назар аударылды.

Қытай тарапы алдағы іс-шараның басым бағыттарын таныстырды, оның ішінде өнеркәсіптік кооперацияны дамыту, цифрлық экономиканы ілгерілету, жасыл технологияларды енгізу және халықаралық сауданы кеңейту мәселелері қамтылды. Тараптар бизнес-миссияларды ұйымдастыру, инвестициялық жобаларды таныстыру және компаниялар арасында тікелей байланыстар орнату құралдарын, сондай-ақ оларды кейінгі шарттық келісімдерге дейін жеткізу мәселелерін жан-жақты талқылады.

Өзара іс-қимылдың практикалық бағытына ерекше мән беріліп, оның ішінде қазақстандық бизнестің ҚХР аумағындағы салалық көрмелерге қатысуы, тікелей іскерлік байланыстарды дамыту және экономиканың басым секторларында бірлескен жобаларды іске асыру мәселелері қарастырылды.

Кездесу қорытындысы бойынша жүйелі өзара іс-қимылды жолға қою, екіжақты байланыстарды жандандыру және нақты экспорттық нәтижелерге қол жеткізуге бағытталған халықаралық іс-шараларға қазақстандық компанияларды тарту бойынша бірлескен жұмысты жалғастыру жөнінде уағдаластықтарға қол жеткізілді.