Іскерлік байланыстарды кеңейту: S-node Trading Advisory Co., Ltd. компаниясының өкілдерімен кездесу өтті

2026 жылғы 27 мамырда Орталық Азия мен Моңғолия нарықтарына шығу кезінде дұрыс тамақтану, wellness-өнімдері және косметика индустриясы салаларындағы жапон компанияларын сүйемелдеуге маманданған S-node Trading Advisory Co., Ltd. компаниясының өкілдерімен кездесу өтті.

S-node Trading Advisory Co., Ltd. тарапынан кездесуге компания президенті Батбаяр Март пен компания директоры Батбаяр Буянжаргал қатысты. Қазақстанның Сыртқы сауда палатасы тарапынан кездесуді Коммерциялық қызмет департаменті директорының орынбасары Мадина Есдәулетова өткізді.

Келіссөздер барысында тараптар екіжақты ынтымақтастықтың перспективалық бағыттарын, жапон өнімдерін Қазақстан мен Орталық Азия елдерінің нарығына ілгерілету мәселелерін, сондай-ақ жапон компанияларының өңірлік нарыққа шығуын қолдау тетіктерін талқылады.

Кездесу барысында келесі мәселелерге ерекше назар аударылды:
— қазақстандық және жапондық компаниялар арасындағы әріптестік байланыстарды дамыту;
— wellness, anti-age, дұрыс тамақтану және косметология салаларындағы өнімдерді ілгерілету;
— B2B-кездесулер мен іскерлік миссияларды ұйымдастыру;
— жергілікті серіктестер мен дистрибьюторларды іздеу;
— JICA-ны қоса алғанда, халықаралық даму институттарымен ықтимал өзара іс-қимыл.

S-node Trading Advisory Co., Ltd. өкілдері отбасылық wellness және салауатты өмір салтына арналған жапон өнімдерінің желісін таныстырып, қазақстандық серіктестермен ұзақ мерзімді ынтымақтастықты дамытуға қызығушылық білдірді.

Кездесу қорытындысы бойынша тараптар сауда-экономикалық ынтымақтастықты одан әрі дамытуға және Орталық Азия өңірінде жапон компаниялары мен өнімдерін ілгерілету бағытындағы практикалық өзара іс-қимылды жалғастыруға өзара мүдделілігін растады.