Мұрат Қарымсақов Бішкекте іскерлік кездесулерге және халықаралық конференцияға қатысты

2026 жылғы 23–24 қыркүйекте «Атамекен» ҚР ҰКП Басқарма төрағасының орынбасары, Қазақстанның Сыртқы сауда палатасының Басқарма төрағасы Мұрат Қарымсақов Қырғыз Республикасына жұмыс сапарымен барды. Сапар аясында ол іскерлік қоғамдастық өкілдерімен кездесулер өткізіп, халықаралық ғылыми-практикалық конференцияда сөз сөйледі.

23 қыркүйекте Қырғыз Республикасының Сауда-өнеркәсіп палатасы және Қырғыз кәсіпкерлер одағы басшылығымен кездесулер өтті. Тараптар биылғы жылдың соңында өткізу жоспарланған Қазақстан – Қырғызстан Іскерлік кеңесінің кезекті отырысына дайындық мәселелерін талқылады. Алдағы отырыстың іскерлік күн тәртібін қалыптастыруға және оған екі елдің бизнес өкілдерін тартуға ерекше назар аударылды.

Сонымен қатар кездесуге қатысушылар сауда-экономикалық ынтымақтастықты одан әрі дамыту, қазақстандық және қырғыз кәсіпкерлері арасындағы тікелей байланыстарды кеңейту, бірлескен жобаларды іске асыру және іскерлік бірлестіктер арасындағы өзара іс-қимылды нығайту перспективаларын қарастырды.

24 қыркүйекте Мұрат Қарымсақов Бішкекте өткен «Қырғыз Республикасының экономикасы: 35 жылдық жолдың қорытындылары және стратегиялық басымдықтар» халықаралық ғылыми-практикалық конференциясында сөз сөйледі. Конференцияны «М. Рысқұлбеков атындағы Қырғыз экономикалық университеті» ғылыми-зерттеу университеті ұйымдастырды. Іс-шараның негізгі мақсаты Қырғыз Республикасының тәуелсіздік жылдарындағы 35 жылдық экономикалық дамуының нәтижелері мен негізгі кезеңдерін жан-жақты ғылыми-практикалық тұрғыдан зерделеу, сондай-ақ өзекті сын-қатерлер мен елдің одан әрі әлеуметтік-экономикалық дамуының стратегиялық бағыттарын талқылау болды.

Конференцияның салтанатты ашылуы мен пленарлық отырысында мемлекеттік органдардың, ғылыми және сарапшылық қоғамдастықтың, жоғары оқу орындары мен халықаралық ұйымдардың өкілдері сөз сөйледі. Олардың қатарында Қырғыз Республикасы Министрлер Кабинеті Төрағасының бірінші орынбасары Данияр Амангелдиев, Қырғыз Республикасының ғылым, жоғары білім және инновациялар министрі Гүлзат Исаматова, Ресей мен Беларусь Одақтық мемлекетінің Мемлекеттік хатшысы Сергей Глазьев, Еуразиялық экономикалық комиссияның энергетика және инфрақұрылым жөніндегі министрі Арзыбек Кожошев, профессор Толобек Камчыбеков, сондай-ақ өңір елдерінің ғалымдары мен сарапшылары болды.

Өз сөзінде Мұрат Қарымсақов өзара сенімге, тату көршілікке және тығыз экономикалық байланыстарға негізделген Қазақстан мен Қырғызстан арасындағы сауда-экономикалық қатынастардың жоғары деңгейін атап өтті. Ол екі елдің өзара сауда көлемін ұлғайтуға, өндірістік кооперацияны дамытуға және бірлескен жобаларды іске асыруға елеулі әлеуеті бар екенін айтты.

Оның айтуынша, бұл үдерісте кәсіпкерлер арасындағы тікелей диалог маңызды рөл атқарады. Мұндай байланыс ынтымақтастықтың перспективалы бағыттарын айқындауға және бизнес өкілдері кездесетін мәселелер бойынша практикалық шешімдер табуға мүмкіндік береді.

Конференция бағдарламасы елдің стратегиялық дамуы, кәсіпорындар экономикасы, банк секторы, туризм, экология және жасыл экономика, халықаралық және ұлттық құқық, сондай-ақ цифрлық трансформация мәселелерін қамтыды.

Сапар Қазақстанның Сыртқы сауда палатасы мен Қырғызстанның іскерлік бірлестіктері арасындағы жүйелі өзара іс-қимылдың жалғасы әрі Қазақстан – Қырғызстан Іскерлік кеңесінің кезекті отырысына дайындықтың маңызды кезеңі болды.