Қазақстан мен Германия агроөнеркәсіп кешеніндегі ынтымақтастықты дамыту мәселелерін талқылады

2026 жылғы 30 қазанда Астанада «Атамекен» ҚР ҰКП алаңында Германия Федеративтік Республикасы Елшісінің тұрақты орынбасары, экономика бөлімінің басшысы Ульрих Кинне бастаған Германияның экономикалық делегациясымен кездесу өтті. Қатысушылар агроөнеркәсіп кешені, ауыл шаруашылығы машиналарын жасау және ауыл шаруашылығы өнімдерін өңдеу салаларындағы ынтымақтастық перспективаларын талқылады.

Қазақстан тарапынан кездесуге «Атамекен» ҚР ҰКП Төралқа Төрағасының Кеңесшісі Сабр Есимбеков, Басқарма Төрағасының Орынбасары Аслан Калигазин, өңдеу өнеркәсібі департаментінің Директоры Асқар Алмат, агроөнеркәсіп кешені және тамақ өнеркәсібі департаменті директорының Орынбасары Бауыржан Ахметаев, ҚССП коммерциялық қызмет департаментінің Директоры Алишер Даркембаев және «Қазақстан машина жасаушылар одағы» ЗТБ өкілдері қатысты.

Германия тарапынан кездесуге Германия агробизнес альянсының (GAA) басқарушы Директоры доктор Пер Бродерзен, Германия машина жасаушылар одағының (VDMA) нарықты талдау жөніндегі сарапшысы Томас Валленборн, сондай-ақ AGCO / Fendt, Pöttinger Landtechnik GmbH, CAISLEY International GmbH және CLAAS компанияларының өкілдері қатысты.

Кездесуді ашқан Сабр Есимбеков делегацияны қарсы алып, «Атамекен» ҚР ҰКП қызметі туралы баяндады. Германия тарапымен танысу барысында Ульрих Кинне делегация мүшелерін таныстырды, ал олар өз ұйымдары мен компаниялары туралы қысқаша ақпарат берді. Екіжақты ынтымақтастық перспективаларын талқылауды жалғастырған Аслан Калигазин Германияның Қазақстанның негізгі сауда-экономикалық және инвестициялық серіктестерінің бірі екенін атап өтті.

«2025 жылы агроөнеркәсіп кешені өнімдерінің өзара саудасы 23%-ға, ал қазақстандық ауыл шаруашылығы өнімдерінің Германияға экспорты 38%-ға өсті. Қазақстанда CLAAS компаниясының ауыл шаруашылығы техникасы өндірісін жергіліктендіру өнеркәсіптік кооперацияның нақты мысалы болып табылады», — деді Аслан Калигазин.

«Атамекен» Басқарма Төрағасының Орынбасары Қазақстан тарапының ауыл шаруашылығы өнімдерін өңдеу, техниканы жаңғырту және технологиялар трансфері салаларындағы ынтымақтастықты кеңейтуге мүдделі екенін атап өтті. Ол цифрлық агротехнологияларды, мал шаруашылығын, ауыл шаруашылығы жануарларын есепке алу және сәйкестендіру жүйелерін де перспективалы бағыттар қатарына қосты.

Алишер Даркембаев Қазақстанның Сыртқы сауда палатасы екіжақты іскерлік кеңестердің қызметін үйлестіретінін атап өтті. Бұл кеңестер Қазақстан мен шет мемлекеттердің іскер топтары арасындағы өзара іс-қимыл алаңдары ретінде тікелей байланыстар орнатуға, сауда-экономикалық қатынастарды кеңейтуге және бірлескен жобаларды ілгерілетуге ықпал етеді.

Кездесу барысында тараптар байланыс деректерімен алмасып, тікелей іскерлік байланыстар орнату, бірлескен жобалардың перспективалары және компаниялар арасындағы өзара іс-қимылды кеңейту мәселелерін талқылады.