Қазақстан-Сауд Арабиясы Іскерлік кеңесінің 5-ші отырысы Қазақстанның Сыртқы сауда палатасының қатысуымен өтті

2026 жылғы 17 ақпанда Эр-Рияд қаласында (Сауд Арабиясы Корольдігі) Қазақстан Республикасы Сыртқы істер министрі Ермек Көшербаевтың ресми сапары аясында Қазақстан-Сауд Арабиясы Іскерлік кеңесінің 5-ші отырысы өтті.

Іс-шараға қатысу үшін Қазақстанның Сыртқы сауда палатасынан делегация жіберді. Отандық бизнестің мүдделерін таныстыру және саудиялық тараппен жұмыс кездесулерін өткізу мақсатында делегация құрамына Палата басқармасы төрағасының кеңесшісі Ғани Аманбаев енді.

Отырыс барысында қазақстандық және саудиялық ұйымдар арасында меморандумдарға қол қою рәсімі өтті, сондай-ақ екі ел министрлерінің және Сауд Арабиясы Палаталар федерациясының төрағасы Хассан бин Муджиб Әл-Хувайзидің қатысуымен ресми ашылу рәсімі ұйымдастырылды. Сонымен қатар инвестициялар, өнеркәсіптік және аграрлық ынтымақтастық, логистика, көлік және цифрлық шешімдер бойынша салалық сессиялар және екі ел компаниялары арасында B2B-келіссөздер өтті.

Отырыста сөз сөйлеген Ғани Аманбаев Қазақстан мен Сауд Арабиясы арасындағы қатынастардың стратегиялық сипатын және Іскерлік кеңестің бірлескен инвестициялық жобаларды ілгерілету мен кәсіпкерлер арасындағы тікелей байланыстарды кеңейтуге арналған тиімді алаң ретіндегі маңызды рөлін атап өтті.

«Сауд Арабиясы Қазақстанның Таяу Шығыстағы маңызды серіктесі болып табылады. Біздің елдер азық-түлік қауіпсіздігі, жасыл энергетика, логистика және тау-кен өнеркәсібі салаларында өзара әрекеттесуді кеңейту үшін елеулі әлеуетке ие», - деп атап өтті ол.

Отырыстың қорытындысы бойынша тараптар сауда-экономикалық және инвестициялық ынтымақтастықты одан әрі арттыруға, сондай-ақ экономиканың басым секторларында жаңа бірлескен бастамаларды іске асыруға мүдделі екендіктерін растады.