Қазақстан-Түрікмен Іскерлік кеңесі ынтымақтастықтың келешегін талқылады

Отырыста екі елдің іскер топтарының өкілдерін жиналды. Энергетика, көлік, логистика және ауыл шаруашылығы сияқты секторлардағы жаңа бастамалар мен жобалар талқыланды.

Іскерлік кеңестің қазақстандық бөлігінің тең төрағасы Айдар Қазыбаев пен түрікмен бөлігінің тең төрағасы Бегенч Аразов қатысушыларды құттықтап, екіжақты диалогты тереңдетудің маңыздылығын атап өтті.

"Жұмысымыздың басым бағыты – өзара сауданы оңайлату. Яғни, мемлекеттік органдар арқылы біз тауарлардың экспорты мен импортын ілгерілету үшін барынша қолайлы жағдай жасауға тиіспіз. Ол үшін сыртқы саудаға қатысушылардан жиі кездесетін мәселелер туралы кері байланыс алу қажет", – деді Айдар Қазыбаев.

Қазақстандық бөлімнің тең төрағасының айтуынша, тағы бір маңызды мәселе – инвестицияларды ілгерілету және қорғау, өйткені Қазақстан мен Түркіменстан бірлесіп жүзеге асырып жатқан 50-ден астам жобалар – бүгінгі таңда жеткіліксіз көрсеткіш. Алайда, спикер бұл ынтымақтастықтың өсу нүктесі деп санайды.

Қазақстанның сыртқы сауда палатасы басқарма төрағасының міндетін атқарушысы Асан Жәкішев өз сөзінде Түркіменстанмен экономикалық байланыстарды нығайтудың маңыздылығын атап өтті. Оның айтуынша, 2024 жылдың алғашқы 8 айында қазақстандық экспорттың 35,7%-ға төмендеуіне қарамастан, екіжақты сауда қатынастары дамуын жалғастыруда, түрікмен тауарларының Қазақстанға импорты да айтарлықтай өсіп бара жатыр.

"Бүгінгі отырыс – сауда-экономикалық қатынастарды дамытудың екіжақты күн тәртібіндегі маңызды іс-шара. Осы диалог алаңы шеңберінде елдеріміздің бизнес топтарының әрекеттестігі жемісті әрі тиімді болатынына және біздің ынтымақтастығымызды жаңа деңгейге шығаратынына сенемін. Біз энергетика, көлік, ауыл шаруашылығы және логистика сияқты салалардағы ынтымақтастықты одан әрі кеңейтудің үлкен әлеуетін көріп отырмыз. Елдеріміз арасындағы сауда-экономикалық ынтымақтастық өзара сауда көлемінде де, экспорт пен импорт құрылымында да елеулі өзгерістермен  сипатталады", – деп толықтырды Қазақстан сыртқы сауда палатасының өкілі.

Отырыста Қазақстанның Түркіменстандағы елшісі Нұрлан Ноғаев сөз сөйлеп, Қазақстан елшілігі екі елдің кәсіпкерлеріне жан-жақты қолдау көрсетіп отырғанын атап өтті. Ол Қазақстан президенті Қасым-Жомарт Тоқаевтың Түркіменстанға алдағы сапарының стратегиялық маңыздылығын баса айтты. Оның пікірінше, бұл екіжақты қарым-қатынастарды одан әрі нығайтудағы маңызды кезең болады.

Кездесу соңында түрікмен бөлімінің тең төрағасы Бегенч Аразов Қазақстан-Түрікмен Іскерлік кеңесінің отырысы екіжақты экономикалық ынтымақтастықты тереңдетуге деген жалпы көзқарасты растағанын атап өтті.

"Түрікменстан мен Қазақстан әлдеқашан сенімді серіктестер болды. Жаңа бастамалар мен бизнес-қауымдастықтарымыздың белсенді диалогының арқасында өзара тиімді даму үшін жаңа мүмкіндіктер аша алатынымызға сенімдімін. Елдеріміздің әлеуеті зор, ендігі біздің міндетіміз – оны екі елдің экономикалары мен халықтарына пайда әкелетін бірлескен жобаларды құру үшін пайдалану", - деп қорытындылады спикер.

Кездесу қорытындысы бойынша тараптар ағымдағы жылдың соңына дейін сауда миссияларын ұйымдастыру жоспарларымен алмасты. Сонымен қатар, қатысушылар аграрлық секторды дамытуға және өзара сауда қатынастарын нығайтуға бағытталған бірлескен бастамаларды одан әрі талқылауға келісті.