Қазақстан мен Мысыр Cауда-Экономикалық ынтымақтастықты кеңейтудің жаңа мүмкіндіктерін талқылады

Бүгін Қазақстанның Сыртқы сауда палатасының Басқарма төрағасы Мұрат Қарымсақов Араб Республикасы Мысырдың сыртқы істер министрінің орынбасары Ахмед Шахинмен кездесті. Кездесуге мысырлық тараптан Араб Республикасы Мысырдың Қазақстандағы Төтенше және Өкілетті Елшісі Ибтиссам Хассан мен Елші орынбасары Карим Мазру да қатысты.

Кездесу барысында тараптар Қазақстан мен Мысыр арасындағы сауда-экономикалық байланыстардың оң динамикасын атап өтті. 2024 жылы екі ел арасындағы тауар айналымы 70%-ға өсіп, 274 миллион АҚШ долларына жетті. Дегенмен, бұл прогреске қарамастан, тараптар ынтымақтастықты одан әрі дамыту әлеуеті жоғары екенін айтты.

Мысырдың сыртқы істер министрінің орынбасары Ахмед Шахин өз елінің құрылыс, фармацевтика және астық жеткізу сияқты стратегиялық маңызды салаларда серіктестікті кеңейтуге мүдделі екенін жеткізді.

«Мысыр құрылыс және фармацевтика салаларында ынтымақтастықты нығайтуға, сондай-ақ агроөнеркәсіптік серіктестікті дамытуға, әсіресе астық жеткізу саласында жұмыс істеуге мүдделі. Біз Суэц каналының индустриялық паркінде Қазақстан бидайын Мысыр мен Африка нарығына экспорттау үшін ірі астық қоймасын салуды ұсынамыз. Сонымен қатар, сауда миссияларын, бизнес-форумдарды және B2B кездесулерді көбірек ұйымдастыру маңызды деп санаймыз. Бұл кәсіпкерлерге тікелей байланыс орнатуға мүмкіндік береді», – деді Ахмед Шахин.

Өз кезегінде, Мұрат Қарымсақов екіжақты іскерлік байланыстарды тереңдету үшін қосымша құралдар құрудың маңыздылығын атап өтті.

«Сауда айналымының оң динамикасына қарамастан, оны одан әрі дамыту үшін қосымша шаралар қажет екенін көріп отырмыз. Қазақстандық тарап Қазақстан-Мысыр іскерлік кеңесінің жұмысын жандандыруды ұсынады. Бұл кеңес экономикалық өзара іс-қимылды кеңейтудің тиімді алаңына айналуы мүмкін. Сонымен қатар, бірлескен жобаларды үйлестіру мен олардың ашықтығын арттыру үшін барлық маңызды бастамаларды нақты уақыт режимінде бақылауға мүмкіндік беретін интерактивті картаны пайдалануға болады», – деп атап өтті Қазақстанның Сыртқы сауда палатасының басшысы.

Ол сондай-ақ Қазақстанның ашық инвестициялық саясатты ұстанатынын және шетелдік компанияларға салықтық жеңілдіктер мен мемлекеттік қолдауды қоса алғанда, бизнес жүргізуге қолайлы жағдай жасайтынын еске салды.

Тараптар екіжақты ынтымақтастықты тереңдетуге дайын екендіктерін білдіріп, іскерлік кездесулер, инвестициялық форумдар мен бірлескен жобаларды ұйымдастыру жұмыстарын жалғастыруға келісті.

Кездесу қорытындысы бойынша Қазақстан мен Мысыр арасындағы экономикалық ынтымақтастықты нығайтуға бағытталған бірқатар келісімдерге қол жеткізілді. Жақын арада екі елдің кәсіпкерлерінің қатысуымен сауда миссиясы мен B2B кездесулер өткізу жоспарланып отыр.

«Біз бірлескен күш-жігерімізбен жаңа биіктерге жетіп, ынтымақтастығымызды одан да жемісті ете алатынымызға сенімдіміз», – деп түйіндеді Мұрат Қарымсақов.