Баку қаласында Қазақстан Сыртқы сауда палатасы мен KOBİA өкілдерінің кездесуі өтті

Бүгін Баку қаласында Қазақстан Сыртқы сауда палатасы аппаратының жетекшісі Асан Жәкішев Әзербайжан Республикасының Кіші және орта бизнес агенттігінің (KOBİA) өкілдерімен кездесу өткізді. Келіссөздер барысында тараптар кіші және орта кәсіпкерлікті дамытудағы ағымдағы және болашақта ықтимал ынтымақтастық бағыттарын талқылады.

Кездесу барысында Асан Жәкішев Сыртқы сауда палатасының жұмысын егжей-тегжейлі баяндап, оның бизнеске қолдау көрсету және халықаралық байланыстарды нығайтудағы рөлін атап өтті.

«Қазақстан Сыртқы сауда палатасы қазақстандық кәсіпкерлерді біріктіретін, олардың жаңа нарықтарға шығуына ықпал ететін және халықаралық ынтымақтастықтың практикалық мәселелерін шешуге көмектесетін алаң болып табылады. Біз қазақстандық компаниялардың өнімдерін экспортқа шығару үшін жағдай жасау және Қазақстанға шетелдік инвестициялар тарту бойынша белсенді жұмыс істеп жатырмыз. KOBİA-мен ынтымақтастық бізге тәжірибе алмасу және бірлескен бизнес жобаларын жүзеге асыру үшін жаңа мүмкіндіктер ашады», - деді Асан Жәкішев.

Сонымен қатар, палата кәсіпкерлердің байланыстарын орнатуына көмектесу үшін бизнес-миссияларды, бизнес-форумдар мен көрмелерді белсенді түрде ұйымдастыратынын атап өтті.

«Біз кәсіпкерлерді қолдаумен қатар, оларға ұзақ мерзімді серіктестіктер құруға да көмек көрсетуге тырысамыз. Қазақстан үшін Әзербайжанмен сауда-экономикалық байланыстарды дамыту өте маңызды, себебі ол біздің өңірдегі маңызды серіктесіміз», - деп қосты ол.

Еске салсақ, Қазақстан Сыртқы сауда палатасы шетелдік серіктестермен сауда-экономикалық қатынастарды дамытуға белсенді түрде қолдау көрсетіп, кіші және орта бизнесті ерекше назарда ұстайды.