Қазақстанның Сыртқы сауда палатасы мен Бенин бизнес саласындағы жаңа мүмкіндіктерді талқылады

Астана, 2025 жылғы 18 сәуір — Қазақстан мен Бенин Республикасы сауда-экономикалық байланыстарды нығайтуға және екіжақты ынтымақтастықты дамытуға ниетті. Келіссөздер барысында кәсіпкерлік саласындағы өзара іс-қимыл перспективалары, сондай-ақ серіктес компанияларды іздеу және Бениннен ауыл шаруашылығы өнімдерін жеткізуді кеңейту мәселелері талқыланды.

Іс-шараға Қазақстанның Сыртқы сауда палатасы басқармасының төрағасының міндетін атқарушы Асан Жәкішев, «Атамекен» Ұлттық кәсіпкерлер палатасының агроөнеркәсіп кешені және тамақ өнеркәсібі департаменті директорының орынбасары Бауыржан Ахметаев, Қазақстан Республикасының Алжир Халық Демократиялық Республикасындағы Төтенше және Өкілетті Елшісі Әнуәрбек Ахметов, сондай-ақ Бенин Республикасы Сыртқы істер министрлігінің өкілдері қатысты.

Кездесу барысында іскерлік ынтымақтастықты дамыту мәселесіне ерекше назар аударылды. Қазақстанның Сыртқы сауда палатасы кәсіпкерлер арасындағы іскерлік байланыстарды орнатуға, келіссөздер ұйымдастыруға, экспорттық жобаларды қолдауға және қазақстандық өнімдерді шетелдік нарықтарға ілгерілетуге байланысты өз мүмкіндіктерін таныстырды.

Бенин тарапының бастамасымен кездесуге Raimbek Group және Zerde Fito қазақстандық компанияларының өкілдері де қатысты. Олар өздерінің экспорттық жобаларын таныстырып, африкалық нарықпен ынтымақтастықты дамытуға қызығушылық білдірді. Келіссөздер барысында Бенин Республикасының сыртқы істер министрі Олушегун Аджади Бакари Қазақстанмен әртүрлі экономикалық салаларда әріптестікті кеңейтуге ашық екенін және ынтымақтастыққа мүдделі екенін атап өтті.

Қазақстанның Сыртқы сауда палатасы өз кезегінде өзара іс-қимылды одан әрі дамытуға дайын екенін білдіріп, сауда, инвестиция және іскерлік серіктестікті дамыту бойынша нақты бастамаларды қарастыруға ашық екенін жеткізді.