Астанада Қазақстан-Бразилия бизнес-дөңгелек үстелі өтті

Дөңгелек үстел Қазақстан мен Бразилия арасындағы сауда-экономикалық және инвестициялық ынтымақтастықты дамыту перспективаларын, іскерлік байланыстарды кеңейтуді, сондай-ақ екі елдің бизнес қауымдастықтары арасындағы өзара іс-қимылды нығайтуды талқылауға арналған алаң болды.

Іс-шара барысында өзара тауар айналымын ұлғайту, агроөнеркәсіптік кешен, өнеркәсіп, логистика, энергетика және сыртқы сауда салаларындағы ынтымақтастықты дамыту мәселелері қаралды. Бизнес үшін қолайлы жағдайлар жасауға және бірлескен жобаларды ілгерілетуге ерекше назар аударылды.

Дөңгелек үстелде сөз сөйлеген Алишер Даркембаев екіжақты ынтымақтастықтың зор әлеуетін атап өтіп, халықаралық іскерлік байланыстарды дамытудағы Қазақстанның Сыртқы сауда палатасының рөлін ерекше айтты.

«Бразилия Қазақстанның Латын Америкасындағы ең ірі сауда серіктесі болып табылады. Бүгінде біз бизнестің ынтымақтастықты кеңейтуге, жаңа серіктестер іздеуге және бірлескен жобаларды іске асыруға жоғары қызығушылық танытып отырғанын көріп отырмыз. Қазақстанның Сыртқы сауда палатасы кәсіпкерлерге B2B-кездесулер ұйымдастырудан және серіктестер іздеуден бастап, сыртқы сауда қызметін сүйемелдеуге және өнімді шетел нарықтарына ілгерілетуге дейін жан-жақты қолдау көрсетуге дайын», — деп атап өтті ол.

Дөңгелек үстел аясында екі елдің мемлекеттік органдарының, іскерлік қауымдастықтары мен компанияларының өкілдері өзара іс-қимылдың перспективалы бағыттарын, сондай-ақ экспортқа бағдарланған бизнесті қолдау және инвестициялар тарту тетіктерін талқылады.

Іс-шара қорытындысы бойынша тараптар Қазақстан-Бразилия ынтымақтастығын одан әрі нығайтуға және екі елдің кәсіпкерлік топтары арасындағы тікелей байланыстарды кеңейтуге мүдделі екенін растады.